दत्तदासांचे दास स्वामी महादेवानंदजी बांबरकर महाराज यांच्या प्रथम पुण्यस्मरणानिमित्त मोफत आरोग्य व रक्तदान शिबिर

आरोग्य व रक्तदान शिबिराचे उद्घाटन करताना जयेशानंदजी बांबरकर महाराज. सोबत रेवण सिद्धेश्वर मठाचे मठाधिपती रविशंकर शिवाचार्य महाराज.

2 नोव्हेंबर, 2021 :  श्री क्षेत्र रायपाटण इथे दत्तभक्तीची पताका रोवत गेली ३० वर्षाहून अधिक वर्षे अध्यात्मिक व सामाजिक कार्यासोबतच व्यसनमुक्तीचे कार्य करणारे दत्तदासांचे दास स्वामी महादेवानंदजी बांबरकर महाराज यांचा प्रथम पुण्यस्मरणाचा कार्यक्रम गुरुद्वादशी (दि. 2 नोव्हेंबर) दिपावली धनत्रयोदशीच्या अत्यंत भक्तिमय वातावरणात पार पडला. स्वामी महादेवानंदजी बांबरकर महाराजांच्या प्रथम पुण्यस्मरणानिमित्त पंचक्रोशीतील भाविकांसाठी व सर्वसामान्यांसाठी मोफत आरोग्य व रक्तदान शिबिराचे आयोजन करण्यात आले होते.

सदर आरोग्य शिबिराचे उद्घाटन जयेशानंदजी बांबरकर महाराज यांच्या हस्ते आणि रेवण सिद्धेश्वर मठाचे मठाधिपती रविशंकर शिवाचार्य महाराज यांच्या उपस्थित पार पडले. यावेळी रायपाटण उपजिल्हा रूग्णालयाचे सुप्रिटेंडंट डॉ. विकास शर्मा, जीवनदाता संस्थेचे अध्यक्ष राजेश नार्वेकर तसेच रत्नागिरी जिल्हा रुग्णालयाचे, तसेच रायपाटण उपजिल्हा रूग्णालयाचे डॉक्टर्स आणि इतर कर्मचारी, शिष्य परिवार, भाविक वर्ग उपस्थित होता.

कोरोनाच्या नियमांचे पालन करत या आरोग्य शिबिराचे नियोजन करण्यात आले होते. आरोग्य व रक्तदान शिबिरासाठी रत्नागिरी शासकीय रुग्णालय, जीवनदान ग्रुप, इन्फिगो आयकेअर सेंटर यांचे मोलाचे सहकार्य लाभले. यावेळी शिबिरात 70 हून अधिक नागरिकांनी आरोग्य व डोळे तपासणी करून घेतली. तर 25 हून अधिक नागरिकांनी रक्तदान केले.

रक्तदान शिबिरार्थींंना शुभेच्छा देताना. 

मंदिराच्यावतीने आरोग्य व रक्तदान शिबिराचे आयोजन केल्याबद्दल प्रमाणपत्र व स्मृतिचिन्ह स्वीकारताना.

शिबिरास उपस्थित शिबिरार्थी.

शारदीय नवरात्र उत्सवात देवीची ९ दिवसातील मनमोहक रूपं!

 या देवी सर्वभूतेषु शक्तिरूपेण संस्थिता,

नमस्तस्यै नमस्तस्यै नमस्तस्यै नमो नमः।।

श्री क्षेत्र रायपाटण येथील दत्तदासांचे दास स्वामी महादेवानंदजी दत्त मंदिरात दि. ७ ऑक्टोबर ते १५ ऑक्टोबर, २०२१ या कालावधीत शारदीय नवरात्र उत्सव मोठ्या उत्साहात पार पडला. कोरोना संसर्गाच्या विळख्यातून आपण हळूहळू बाहेर येत आहोत. महाराष्ट्र शासनानेही नवरात्र उत्सवाच्या पहिल्या दिवसापासून सर्व मंदिरं खुली करण्यास परवानगी दिली होती. शासनाने घालून दिलेल्या सर्व नियमांचे पालन करून हा शारदीय नवरात्र उत्सव साजरा करण्यात आला. आपल्या सर्वांवर आलेली संकट दूर होवो, अशी प्रार्थना आई अंबामातेच्या चरणी करूया.

|| आंबे माते की जय ||

रत्नागिरी जिल्ह्यातील विद्यार्थ्यांसाठी सराव परीक्षा - २०२१

 दत्तदासांचे दास स्वामी महादेवानंदजी दत्त मंदिर ट्रस्ट, रायपाटण, ता. राजापूर, जि. रत्नागिरी यांच्यावतीने रत्नागिरी जिल्ह्यातील शालेय विद्यार्थ्यांच्या मागणीनुसार शिष्यवृत्ती परीक्षेच्या सरावासाठी नव्याने पुन्हा एकदा लिंक ओपन करण्यात आली आहे. विद्यार्थ्यांनी या सराव परीक्षेचा लाभ घेऊन मुख्य परीक्षेत अव्वल यश मिळवावे.

 

पाचवी शिष्यवृत्ती परीक्षा पेपर पहिला मराठी व गणित - https://forms.gle/1mwwncdPqArDKdAM8

पाचवी शिष्यवृत्ती परीक्षा पेपर दुसरा इंग्रजी व बुद्धिमत्ता - https://forms.gle/X9TjK1anAd1SXjvv5

आठवी शिष्यवृत्ती परीक्षा पेपर पहिला मराठी व गणित - https://forms.gle/DVXDcqqWvPbvkMXv9

आठवी शिष्यवृत्ती परीक्षा पेपर दुसरा इंग्रजी व बुद्धिमत्ता - https://forms.gle/FKA5vnTUPM5WAcLz8

 

सर्व विद्यार्थ्यांना मुख्य परीक्षेसाठी मन:पूर्वक शुभेच्छा!

 

|| अवधूत चिंतन श्री गुरूदेव दत्त ||

ऑनलाईन शिष्यवृत्ती सराव परीक्षा - २०२१ ला उत्स्फूर्त प्रतिसाद

दत्तदासांचे दास स्वामी महादेवानंदजी 

दत्तदासांचे दास स्वामी महादेवानंदजी दत्त मंदिर ट्रस्ट, रायपाटण, ता. राजापूर, जि. रत्नागिरी यांच्यावतीने वर्षभर विविध धार्मिक व सामाजिक उपक्रम राबविले जातात. यात अखंड हरिनाम सप्ताह, यज्ञ सप्ताह, दत्त जयंती, विश्वशांती यज्ञ यासोबतच बालगोपाळ मेळावा, शिष्यवृत्ती सराव परीक्षा, चित्रकला-अभंग गायन स्पर्था आदींचे ही आयोजन केले जाते. तालुक्यातील शालेय विद्यार्थ्यांना शिष्यवृत्ती परीक्षेचा सराव व्हावा. यासाठी कित्येक वर्षापासून मंदिराच्या वतीने शिष्यवृत्ती सराव परीक्षेचे आयोजन केले जाते. यास शिक्षण विभागाचा सकारात्मक प्रतिसाद मिळत असून तालुक्यातील हजारो विद्यार्थी याचा लाभ घेत आहेत.  यावर्षी कोरोनाच्या पार्श्वभूमीवर विद्यार्थ्यांचे नुकसान होऊ नये म्हणून गुगल फॉर्मद्वारे ही सराव परीक्षा प्रथमच Online घेण्यात आली. आपल्या महाराजांचे आशीर्वाद आणि आपल्या सगळ्यांच्या शुभेच्छामुळे या सराव परीक्षेस विद्यार्थ्यांचा उत्स्फूर्त प्रतिसाद मिळाला. या ऑनलाईन परीक्षेत २००० हून अधिक विद्यार्थी सहभागी झाले होते. स्वामी महादेवानंदजी बांबरकर महाराज यांनी सुरू केलेला हा शैक्षणिक उपक्रम विद्यार्थ्यांचा भविष्यकाळ सुवर्णकाळ ठरवणारा आहे.

|| अवधूत चिंतन श्री गुरुदेव दत्त||